ਚੰਡੀਗੜ੍ਹ ‘ਚ ‘ਡਰੱਗ-ਫ਼੍ਰੀ’ ਡੈੱਡਲਾਈਨ ਤੋਂ ਬਾਅਦ ਵੱਡਾ ਐਕਸ਼ਨ !
ਚੰਡੀਗੜ੍ਹ ਵਿੱਚ ਨਸ਼ਿਆਂ ਖ਼ਿਲਾਫ਼ ਪੁਲਿਸ ਨੇ ਆਪਣੀ ਕਾਰਵਾਈ ਬੇਹੱਦ ਤੇਜ਼ ਕਰ ਦਿੱਤੀ ਹੈ। ਸ਼ਹਿਰ ਵਿੱਚ ਘੋੜਿਆਂ (ਮਾਊਂਟਿਡ ਪੁਲਿਸ) ਨਾਲ ਗਸ਼ਤ ਕਰਨ ਦੇ ਨਾਲ-ਨਾਲ ਥਾਣਾ ਇੰਚਾਰਜ ਅਤੇ ਇਲਾਕਾ DSP ਰਾਤ ਨੂੰ ਵੀ ਖ਼ੁਦ ਫੀਲਡ ਵਿੱਚ ਉੱਤਰ ਰਹੇ ਹਨ। ਪੁਲਿਸ ਦੀ ਇਸ ਕਾਰਵਾਈ ਦੀ ਵੀਡੀਓਗ੍ਰਾਫ਼ੀ ਕਰਕੇ ਮੀਡੀਆ ਤੱਕ ਪਹੁੰਚਾਈ ਜਾ ਰਹੀ ਹੈ। ਮਹਿਜ਼ ਚਾਰ ਦਿਨਾਂ ਵਿੱਚ ਪੁਲਿਸ ਦੇ ਇਸ ਬਦਲੇ ਤੇਵਰਾਂ ਨੂੰ ਚੰਡੀਗੜ੍ਹ ਦੇ ਪ੍ਰਸ਼ਾਸਕ ਗੁਲਾਬ ਚੰਦ ਕਟਾਰੀਆ ਦੇ ਨਿਰਦੇਸ਼ਾਂ ਨਾਲ ਜੋੜ ਕੇ ਦੇਖਿਆ ਜਾ ਰਿਹਾ ਹੈ।
ਜੰਗਲਾਤ ਇਲਾਕਿਆਂ, ਖੰਡਰਾਂ ਅਤੇ ਸ਼ਮਸ਼ਾਨਘਾਟ ਨੇੜੇ ਬਣਾਏ ਗਏ ਨਸ਼ੇੜੀਆਂ ਦੇ ਅੱਡਿਆਂ ‘ਤੇ ਮਾਊਂਟਿਡ ਪੁਲਿਸ ਦੀ ਮਦਦ ਨਾਲ ਸਰਚ ਅਭਿਆਨ ਚਲਾਇਆ ਗਿਆ। ਜੰਗਲੀ ਖੇਤਰ ‘ਚੋਂ ਫੜੇ ਗਏ ਲੋਕਾਂ ਕੋਲੋਂ 10 ਰੁਪਏ ਦੇ ਨੋਟ, ਫੁਆਇਲ ਪੇਪਰ ‘ਤੇ ਲੱਗਿਆ ਚਿੱਟਾ, ਲਾਈਟਰ ਅਤੇ ਗਰਮ ਕਰਨ ਵਾਲੇ ਚਮਚ ਬਰਾਮਦ ਹੋਏ। ਪੁਲਿਸ ਨੇ ਛਾਪੇਮਾਰੀ ਦੌਰਾਨ ਸਰਕਾਰੀ ਕੈਮਰਾਮੈਨ ਅਤੇ ਪੁਲਿਸ ਕਰਮਚਾਰੀਆਂ ਦੇ ਮੋਬਾਈਲਾਂ ਰਾਹੀਂ ਹਰ ਗਤੀਵਿਧੀ ਦੀ ਵੀਡੀਓਗ੍ਰਾਫ਼ੀ ਕੀਤੀ ਹੈ, ਤਾਂ ਜੋ ਅਦਾਲਤ ਵਿੱਚ ਕੇਸ ਮਜ਼ਬੂਤੀ ਨਾਲ ਸਾਬਤ ਕੀਤਾ ਜਾ ਸਕੇ।
ਚੰਡੀਗੜ੍ਹ ਪੁਲਿਸ ਨੇ 82 ਵਿਅਕਤੀਆਂ ਖ਼ਿਲਾਫ਼ ਰੋਕਥਾਮ ਕਾਰਵਾਈ (ਪ੍ਰੀਵੈਂਟਿਵ ਐਕਸ਼ਨ) ਲੈਂਦਿਆਂ ਉਨ੍ਹਾਂ ਨੂੰ ਜੇਲ੍ਹ ਭੇਜ ਦਿੱਤਾ ਹੈ। ਇਸ ਦੇ ਨਾਲ ਹੀ NDPS ਐਕਟ ਤਹਿਤ 16 FIR ਦਰਜ ਕੀਤੀਆਂ ਗਈਆਂ ਹਨ, ਜਿਨ੍ਹਾਂ ਵਿੱਚ ਨਸ਼ੀਲੇ ਪਦਾਰਥਾਂ ਦੀ ਬਰਾਮਦਗੀ ਵੀ ਹੋਈ ਹੈ। ਪੁਲਿਸ ਨੇ ਜ਼ਮੀਨੀ ਪੱਧਰ ‘ਤੇ ਆਕ੍ਰਾਮਕ ਮੁਹਿੰਮ ਸ਼ੁਰੂ ਕਰ ਦਿੱਤੀ ਹੈ। ਇਸ ਕਾਰਵਾਈ ਵਿੱਚ ਸਿਰਫ਼ ਥਾਣਾ ਇੰਚਾਰਜ ਅਤੇ ਏਰੀਆ DSP ਹੀ ਨਹੀਂ, ਸਗੋਂ CRPF ਦੀ ਟੀਮ ਵੀ ਨਾਲ ਤਾਇਨਾਤ ਹੈ।
CID ਵਿੰਗ ਨੂੰ ਵੀ ਪੂਰੀ ਤਰ੍ਹਾਂ ਐਕਟਿਵ ਕਰ ਦਿੱਤਾ ਗਿਆ ਹੈ। CID ਦੀ ਟੀਮ ਕਾਲੋਨੀਆਂ ਵਿੱਚ ਆਪਣੇ ਮੁਖਬਰਾਂ ਰਾਹੀਂ ਡਰੱਗ ਸਪਲਾਇਰਾਂ ਅਤੇ ਪੈਡਲਰਾਂ ਦੀਆਂ ਸੂਚੀਆਂ ਤਿਆਰ ਕਰ ਰਹੀ ਹੈ। ਐਂਟੀ ਨਾਰਕੋਟਿਕ ਟਾਸਕ ਫੋਰਸ ਦੇ ਨਾਲ-ਨਾਲ ਹੁਣ ਸਥਾਨਕ ਪੁਲਿਸ CRPF ਦੇ ਹਥਿਆਰਬੰਦ ਜਵਾਨਾਂ ਨੂੰ ਨਾਲ ਲੈ ਕੇ ਤੜਕੇ ਅਤੇ ਦੇਰ ਰਾਤ ਸਰਪ੍ਰਾਈਜ਼ ਚੈਕਿੰਗ ਅਤੇ ਰੇਡ ਕਰ ਰਹੀ ਹੈ। ਸ਼ਹਿਰ ਵਿੱਚ ਨਸ਼ੇ ਦੀ ਸਪਲਾਈ ਚੇਨ ਨੂੰ ਤੋੜਨ ਲਈ 2 ਜਾਂ ਇਸ ਤੋਂ ਵੱਧ NDPS ਕੇਸਾਂ ਵਾਲੇ ਅਪਰਾਧੀਆਂ ਨੂੰ PIT-NDPS ਐਕਟ ਤਹਿਤ ਇੱਕ ਸਾਲ ਲਈ ਡਿਟੇਨ ਕਰਨ ਦੀ ਯੋਜਨਾ ਤਿਆਰ ਕੀਤੀ ਗਈ ਹੈ।
ਚੰਡੀਗੜ੍ਹ ਦੇ ਪ੍ਰਸ਼ਾਸਕ ਗੁਲਾਬ ਚੰਦ ਕਟਾਰੀਆ ਨੇ ਬੀਤੇ ਵੀਰਵਾਰ ਨੂੰ ਨਗਰ ਨਿਗਮ ਦੇ ‘ਨਸ਼ਾ ਮੁਕਤ ਚੰਡੀਗੜ੍ਹ’ ਪ੍ਰੋਗਰਾਮ ਦੌਰਾਨ ਕਿਹਾ ਸੀ ਕਿ ਜੇਕਰ ਪੁਲਿਸ ਸਖ਼ਤ ਐਕਸ਼ਨ ਲਵੇ ਤਾਂ ਨਸ਼ਾ ਖ਼ਤਮ ਹੋ ਸਕਦਾ ਹੈ। ਉਨ੍ਹਾਂ ਨੇ ਕੌਂਸਲਰਾਂ ਨੂੰ ਵੀ ਆਪਣੇ-ਆਪਣੇ ਖੇਤਰਾਂ ਵਿੱਚ ਨਸ਼ਾ ਰੋਕਣ ਲਈ ਅੱਗੇ ਆਉਣ ਦਾ ਸੱਦਾ ਦਿੱਤਾ ਸੀ। ਇਸ ਤੋਂ ਬਾਅਦ ਨਗਰ ਨਿਗਮ ਦੀ ਡਿਪਟੀ ਮੇਅਰ ਸੁਮਨ ਦੇਵੀ ਨੇ ਪੁਲਿਸ ਦੀ ਜਨਤਕ ਮੀਟਿੰਗ ਵਿੱਚ ਖ਼ੁਲਾਸਾ ਕੀਤਾ ਸੀ ਕਿ ਉਨ੍ਹਾਂ ਦੇ ਇਲਾਕੇ ਵਿੱਚ ਸ਼ਰੇਆਮ ਨਸ਼ਾ ਵਿਕ ਰਿਹਾ ਹੈ। ਉਸ ਸਮੇਂ DSP ਅਤੇ IT ਪਾਰਕ ਥਾਣਾ ਇੰਚਾਰਜ ਮੀਨੀ ਭਾਰਦਵਾਜ ਵੀ ਮੌਜੂਦ ਸਨ। ਸੁਮਨ ਦੇਵੀ ਨੇ ਤਿੰਨ ਵੀਡੀਓਜ਼ ਵੀ ਦਿਖਾਈਆਂ ਸਨ, ਜਿਨ੍ਹਾਂ ਵਿੱਚ 3 ਨੌਜਵਾਨ ਨਸ਼ੇ ਦੀ ਹਾਲਤ ਵਿੱਚ ਝੂਮਦੇ ਦਿਸ ਰਹੇ ਸਨ।
ਦੋ ਦਿਨ ਪਹਿਲਾਂ ਨਿਊ ਇੰਦਰਾ ਕਾਲੋਨੀ ਦੇ ਰਹਿਣ ਵਾਲੇ ਸਮੀਰ ਨਾਮ ਦੇ ਨੌਜਵਾਨ ‘ਤੇ ਪਾਰਕ ‘ਚ 5 ਨੌਜਵਾਨਾਂ ਨੇ ਚਾਕੂਆਂ ਨਾਲ ਹਮਲਾ ਕੀਤਾ ਸੀ। ਸਮੀਰ ਦੇ ਪਿਤਾ ਦਾ ਦੋਸ਼ ਹੈ ਕਿ ਹਮਲਾਵਰ ਨਸ਼ਾ ਕਰਦੇ ਹਨ ਅਤੇ ਪੁਲਿਸ ਨੂੰ ਬਾਰ-ਬਾਰ ਸ਼ਿਕਾਇਤ ਕਰਨ ਦੇ ਬਾਵਜੂਦ ਕੋਈ ਕਾਰਵਾਈ ਨਹੀਂ ਹੋਈ। ਉਨ੍ਹਾਂ ਇਹ ਵੀ ਦੋਸ਼ ਲਾਇਆ ਕਿ ਉਨ੍ਹਾਂ ਦੇ ਭਰਾ ਪਵਨ, ਜਿਸ ਦੀ ਥਾਰ ਗੱਡੀ ਨਾਲ ਟੱਕਰ ਮਾਰ ਕੇ ਹੱਤਿਆ ਕੀਤੀ ਗਈ ਸੀ, ਦੀ ਮੌਤ ਵੀ ਨਸ਼ੇ ਦੇ ਮੁੱਦੇ ਨਾਲ ਜੁੜੀ ਹੋਈ ਸੀ ਕਿਉਂਕਿ ਉਸ ਨੇ ਨਸ਼ੇ ਖ਼ਿਲਾਫ਼ ਆਵਾਜ਼ ਚੁੱਕੀ ਸੀ। ਇਸੇ ਤਰ੍ਹਾਂ ਸੈਕਟਰ-49 ਵਿੱਚ ਆਟੋ ਡਰਾਈਵਰ ਰਾਜਕੁਮਾਰ ‘ਤੇ ਹੋਈ ਫਾਇਰਿੰਗ ਮਾਮਲੇ ‘ਚ ਵੀ ਪੀੜਤ ਨੇ ਦੋਸ਼ ਲਾਇਆ ਸੀ ਕਿ ਇਲਾਕੇ ‘ਚ ਵਿਕਦੇ ਨਸ਼ੇ ਖ਼ਿਲਾਫ਼ ਬੋਲਣ ਕਰਕੇ ਉਸ ‘ਤੇ ਗੋਲੀਆਂ ਚਲਾਈਆਂ ਗਈਆਂ ਸਨ।
