ਕਾਂਗਰਸ ਹਾਈਕਮਾਂਡ ਦੇ ਸਖ਼ਤ ਰੁਖ਼ ਕਾਰਨ ਚੰਨੀ ਬੈਕਫੁੱਟ ‘ਤੇ
ਪੰਜਾਬ ਕਾਂਗਰਸ ਵਿੱਚ ਬਾਗੀ ਤੇਵਰ ਦਿਖਾ ਰਹੇ ਸਾਬਕਾ ਮੁੱਖ ਮੰਤਰੀ ਅਤੇ ਜਲੰਧਰ ਤੋਂ ਸੰਸਦ ਮੈਂਬਰ ਚਰਨਜੀਤ ਸਿੰਘ ਚੰਨੀ ਹਾਈਕਮਾਂਡ ਦੇ ਸਖ਼ਤ ਰੁਖ਼ ਅੱਗੇ ਬੈਕਫੁੱਟ ‘ਤੇ ਨਜ਼ਰ ਆਏ ਹਨ। ਪ੍ਰਧਾਨ ਰਾਜਾ ਵੜਿੰਗ ਖ਼ਿਲਾਫ਼ ਮੋਰਚਾ ਖੋਲ੍ਹਣ ਤੋਂ ਬਾਅਦ ਬੁੱਧਵਾਰ ਨੂੰ ਉਨ੍ਹਾਂ ਨੇ ਪਹਿਲੀ ਵਾਰ ਇੱਕ ਮੀਡੀਆ ਚੈਨਲ ਨਾਲ ਗੱਲਬਾਤ ਕੀਤੀ। ਕਾਂਗਰਸ ਵਿੱਚ ਉਨ੍ਹਾਂ ਦੀ ਨਾਰਾਜ਼ਗੀ ਨੂੰ ਲੈ ਕੇ ਪੁੱਛੇ ਗਏ ਸਵਾਲ ‘ਤੇ ਚੰਨੀ ਨੇ ਕਿਹਾ— ‘ਮੇਰਾ ਮਕਸਦ ਕਾਂਗਰਸ ਨੂੰ ਅੱਗੇ ਲੈ ਕੇ ਜਾਣਾ ਹੈ। ਬਾਕੀ ਇਸ ਮਾਮਲੇ ਵਿੱਚ ਕੁਝ ਨਹੀਂ ਕਹਾਂਗਾ।’
ਚੰਨੀ ਨੇ ਅੱਗੇ ਕਿਹਾ “ਰਾਹੁਲ ਗਾਂਧੀ ਮੇਰੇ ਲੀਡਰ ਹਨ ਅਤੇ ਰਹਿਣਗੇ। ਸਾਰੇ ਮਸਲੇ ਜਲਦ ਹੀ ਸੁਲਝਾ ਲਏ ਜਾਣਗੇ। ਪਾਰਟੀ ਜੋ ਰਣਨੀਤੀ ਬਣਾਏਗੀ, ਉਸੇ ਮੁਤਾਬਕ ਅੱਗੇ ਵਧਾਂਗੇ।”
ਇਸ ਤੋਂ ਪਹਿਲਾਂ ਪੰਜਾਬ ਦੇ 5 ਦਿਨਾਂ ਦੇ ਦੌਰੇ ‘ਤੇ ਆਏ ਏ.ਆਈ.ਸੀ.ਸੀ. (AICC) ਇੰਚਾਰਜ ਭੂਪੇਸ਼ ਬਘੇਲ ਨੇ ਸਾਬਕਾ ਮੁੱਖ ਮੰਤਰੀ ਚਰਨਜੀਤ ਚੰਨੀ ਅਤੇ ਉਨ੍ਹਾਂ ਦੇ ਸਮਰਥਕਾਂ ਨੂੰ ਦੋ-ਟੂਕ ਕਹਿ ਦਿੱਤਾ ਹੈ ਕਿ ਪ੍ਰਧਾਨ ਬਦਲਣਾ ਗੁੱਡੇ-ਗੁੱਡੀਆਂ ਦੀ ਖੇਡ ਨਹੀਂ ਹੈ। ਹਾਈਕਮਾਂਡ ਆਪਣਾ ਫ਼ੈਸਲਾ ਨਹੀਂ ਬਦਲੇਗੀ। ਰਾਜਾ ਵੜਿੰਗ ਨੂੰ 23 ਜ਼ਿਲ੍ਹਾ ਪ੍ਰਧਾਨਾਂ ਦਾ ਸਮਰਥਨ ਹਾਸਲ ਹੈ। ਮੀਟਿੰਗ ਵਿੱਚ ਜ਼ਿਲ੍ਹਾ ਪ੍ਰਧਾਨ ਆਪਣੀ ਸਹਿਮਤੀ ਦੇ ਚੁੱਕੇ ਹਨ।ਬਘੇਲ ਦਾ ਇਹ ਤਲਖ਼ (ਸਖ਼ਤ) ਰਵੱਈਆ ਉਦੋਂ ਸਾਹਮਣੇ ਆਇਆ ਹੈ, ਜਦੋਂ ਚੰਨੀ ਧੜੇ ਨੇ ਦੋਸ਼ ਲਗਾਇਆ ਸੀ ਕਿ ਉਨ੍ਹਾਂ ਨੇ ਹਾਈਕਮਾਂਡ ਨੂੰ ਗੁੰਮਰਾਹ ਕੀਤਾ ਹੈ ਅਤੇ ਉਨ੍ਹਾਂ ਨੂੰ ਗਲਤ ਰਿਪੋਰਟ ਦਿੱਤੀ ਗਈ। ਅਸੀਂ ਰਾਜਾ ਵੜਿੰਗ ਦੀ ਅਗਵਾਈ ਵਿੱਚ 2027 ਦੀਆਂ ਚੋਣਾਂ ਨਹੀਂ ਜਿੱਤ ਸਕਦੇ।
ਬਾਜਵਾ ਬੋਲੇ- ਟੁੱਟ ਤੋਂ ਬਾਅਦ ਵੀ AAP 92 ਸੀਟਾਂ ਜਿੱਤੀ
ਇਸੇ ਦੌਰਾਨ ਕਾਂਗਰਸ ਵਿਧਾਇਕ ਦਲ ਦੇ ਨੇਤਾ ਪ੍ਰਤਾਪ ਸਿੰਘ ਬਾਜਵਾ ਨੇ ਵੀ ਤੇਵਰ ਦਿਖਾਉਂਦਿਆਂ ਕਿਹਾ ਕਿ 2022 ਦੀਆਂ ਚੋਣਾਂ ਵਿੱਚ ਆਮ ਆਦਮੀ ਪਾਰਟੀ ਦੇ 22 ਵਿੱਚੋਂ 10 ਵਿਧਾਇਕ ਵੱਖ ਹੋ ਗਏ ਸਨ ਅਤੇ ਉਸ ਤੋਂ ਬਾਅਦ ਵੀ ਉਹ ਚੋਣਾਂ ਵਿੱਚ 92 ਸੀਟਾਂ ਜਿੱਤ ਗਏ। ਜੇਕਰ ਸੀਨੀਅਰ ਲੀਡਰ ਪਿੱਛੇ ਰਹਿ ਗਏ ਤਾਂ ਨਵੇਂ ਲੋਕ ਆਉਣਗੇ। ਲੋਕਾਂ ਨੇ ਜੋ ਮਨ ਬਣਾ ਲਿਆ ਹੈ, ਉਹ ਉਸੇ ਦੇ ਨਾਲ ਹੀ ਰਹਿਣਗੇ। ਉਨ੍ਹਾਂ ਨੇ ਚੰਨੀ ਧੜੇ ਦਾ ਨਾਂ ਲਏ ਬਿਨਾਂ ਕਿਹਾ ਕਿ ਅੱਠ-ਦਸ ਦਿਨ ਦੇਖ ਲੈਣ, ਜੇਕਰ ਉਨ੍ਹਾਂ ਦੀ ਅਪੀਲ ਰੱਦ (ਰਿਜੈਕਟ) ਹੋ ਗਈ ਤਾਂ ਫਿਰ ਤੋਂ ਗੱਲ ਕਰ ਸਕਦੇ ਹਨ।
ਪਰਗਟ ਸਿੰਘ ਬੋਲੇ- ਇਹ ਐਕਸਪੈਰੀਮੈਂਟ ਦਾ ਸਮਾਂ ਨਹੀਂ
ਉੱਥੇ ਹੀ ਜਲੰਧਰ ਕੈਂਟ ਦੇ ਵਿਧਾਇਕ (MLA) ਪਰਗਟ ਸਿੰਘ ਦਾ ਕਹਿਣਾ ਹੈ ਕਿ ਹੁਣ ਪੰਜਾਬ ਵਿੱਚ ਐਕਸਪੈਰੀਮੈਂਟ (ਤਜ਼ਰਬਿਆਂ) ਦਾ ਸਮਾਂ ਨਹੀਂ ਹੈ। ਪੰਜਾਬ ਦੀ ਲੜਾਈ ਬਹੁਤ ਵੱਡੀ ਹੈ ਅਤੇ ਚੋਣਾਂ ਬਹੁਤ ਨਜ਼ਦੀਕ ਹਨ। ਫੋਟੋ ਸੈਸ਼ਨ ਦੇ ਜ਼ਰੀਏ ਆਪਣੀ ਤਾਕਤ ਦਿਖਾਉਣ ਦਾ ਸਮਾਂ ਨਹੀਂ ਹੈ। ਜੋ ਸਾਡੀਆਂ ਛੋਟੀਆਂ-ਛੋਟੀਆਂ ਮੁਸ਼ਕਿਲਾਂ (ਪ੍ਰਾਬਲਮਜ਼) ਹਨ, ਉਨ੍ਹਾਂ ਨੂੰ ਹੱਲ (ਸ਼ਾਰਟਆਊਟ) ਕਰ ਦੇਣਾ ਚਾਹੀਦਾ ਹੈ। ਫੋਟੋ ਸੈਸ਼ਨ ਦੇ ਜ਼ਰੀਏ ਨੈਰੇਟਿਵ ਸੈੱਟ ਕੀਤੇ ਜਾ ਰਹੇ ਹਨ।
ਚੰਨੀ ਨੂੰ ਮਨਾਉਣ ਦੇ ਬਘੇਲ ਦੇ 3 ਦਾਅ ਫੇਲ੍ਹ:-
ਬਾਜਵਾ ਰਾਹੀਂ ਕੋਸ਼ਿਸ਼, ਗੱਲ ਨਹੀਂ ਬਣੀ: ਚੰਡੀਗੜ੍ਹ ਪਹੁੰਚਦਿਆਂ ਹੀ ਭੂਪੇਸ਼ ਬਘੇਲ ਨੇ ਸਭ ਤੋਂ ਪਹਿਲਾਂ ਵਿਰੋਧੀ ਧਿਰ ਦੇ ਨੇਤਾ ਪ੍ਰਤਾਪ ਸਿੰਘ ਬਾਜਵਾ ਨਾਲ ਮੁਲਾਕਾਤ ਕੀਤੀ। ਮੰਨਿਆ ਗਿਆ ਕਿ ਬਾਜਵਾ ਰਾਹੀਂ ਚੰਨੀ ਅਤੇ ਉਨ੍ਹਾਂ ਦੇ ਸਮਰਥਕਾਂ ਤੱਕ ਸੁਨੇਹਾ ਪਹੁੰਚਾਇਆ ਜਾਵੇਗਾ। ਬਾਜਵਾ ਨੇ ਮੀਡੀਆ ਵਿੱਚ ਵੀ ਵਿਵਾਦ ਸੁਲਝਣ ਦੀ ਗੱਲ ਕਹੀ, ਪਰ ਚੰਨੀ ਧੜਾ ਆਪਣੇ ਰੁਖ਼ ‘ਤੇ ਕਾਇਮ ਰਿਹਾ।
ਵੇਰਕਾ ਨੇ ਵੀ ਕੀਤੀ ਪਹਿਲ, ਫਿਰ ਵੀ ਨਹੀਂ ਹੋਈ ਮੁਲਾਕਾਤ: ਇਸ ਤੋਂ ਬਾਅਦ ਕਾਰਜਕਾਰੀ ਸੂਬਾ ਪ੍ਰਧਾਨ ਰਾਜਕੁਮਾਰ ਵੇਰਕਾ ਨੇ ਵੀ ਚੰਨੀ ਨਾਲ ਮੁਲਾਕਾਤ ਕੀਤੀ। ਦੱਸਿਆ ਜਾ ਰਿਹਾ ਹੈ ਕਿ ਬਘੇਲ ਨੂੰ ਮਿਲਣ ਤੋਂ ਪਹਿਲਾਂ ਵੇਰਕਾ ਨੇ ਚੰਨੀ ਨਾਲ ਬੰਦ ਕਮਰੇ ਵਿੱਚ ਚਰਚਾ ਕੀਤੀ। ਸਿਆਸੀ ਹਲਕਿਆਂ ਵਿੱਚ ਇਸ ਨੂੰ ਦੋਵਾਂ ਧਿਰਾਂ ਵਿਚਾਲੇ ਗੱਲਬਾਤ ਦੀ ਕੋਸ਼ਿਸ਼ ਮੰਨਿਆ ਗਿਆ, ਪਰ ਇਸ ਤੋਂ ਬਾਅਦ ਵੀ ਚੰਨੀ ਧੜੇ ਦਾ ਕੋਈ ਨੇਤਾ ਬਘੇਲ ਨੂੰ ਮਿਲਣ ਨਹੀਂ ਪਹੁੰਚਿਆ।
ਚਾਹ ‘ਤੇ ਬੁਲਾਉਣ ਦਾ ਆਫ਼ਰ, ਉਹ ਵੀ ਬੇਕਾਰ: ਇਸ ਦੌਰਾਨ ਇੰਚਾਰਜ ਭੂਪੇਸ਼ ਬਘੇਲ ਨੇ ਮੀਡੀਆ ਰਾਹੀਂ ਇਹ ਸੁਨੇਹਾ ਵੀ ਦਿੱਤਾ ਕਿ “ਜੇਕਰ ਕੋਈ ਮੈਨੂੰ ਚਾਹ ‘ਤੇ ਬੁਲਾਏਗਾ ਤਾਂ ਮੈਂ ਜ਼ਰੂਰ ਜਾਵਾਂਗਾ।” ਇਸ ਦੇ ਬਾਵਜੂਦ ਦੌਰੇ ਦੇ ਦੂਜੇ ਦਿਨ ਵੀ ਚੰਨੀ ਧੜੇ ਨੇ ਦੂਰੀ ਬਣਾਈ ਰੱਖੀ।
