ਦੇਸ਼ ਦੇ 70% ਹਿੱਸੇ ‘ਚ ਬੱਦਲਾਂ ਦਾ ਡੇਰਾ, ਜਾਣੋ ਤੁਹਾਡੇ ਸ਼ਹਿਰ ‘ਚ ਕਿਵੇਂ ਰਹੇਗਾ ਮੌਸਮ
ਇਸਰੋ (ISRO) ਦੀਆਂ ਸੈਟੇਲਾਈਟ ਤਸਵੀਰਾਂ ਅਨੁਸਾਰ ਦੇਸ਼ ਦੇ ਲਗਭਗ 70% ਹਿੱਸੇ ਵਿੱਚ ਮਾਨਸੂਨੀ ਬੱਦਲ ਛਾਏ ਹੋਏ ਹਨ। ਅਗਲੀ 25 ਜੁਲਾਈ ਤੱਕ ਉੱਤਰ, ਪੂਰਬ ਅਤੇ ਉੱਤਰ-ਪੂਰਬੀ ਭਾਰਤ ਸਮੇਤ ਦੇਸ਼ ਦੇ 60% ਤੋਂ ਵੱਧ ਹਿੱਸਿਆਂ ਵਿੱਚ ਚੰਗਾ ਮੀਂਹ ਪੈਣ ਦੀ ਸੰਭਾਵਨਾ ਹੈ। ਇਸ ਮਾਨਸੂਨ ਸੀਜ਼ਨ ਵਿੱਚ ਦੇਸ਼ ਭਰ ਵਿੱਚ ਮੀਂਹ ਆਮ ਨਾਲੋਂ 24% ਘੱਟ ਪਿਆ ਹੈ।ਇੱਧਰ, ਯੂਪੀ (ਉੱਤਰ ਪ੍ਰਦੇਸ਼) ਵਿੱਚ ਨਦੀਆਂ ਦਾ ਜਲ ਪੱਧਰ ਤੇਜ਼ੀ ਨਾਲ ਵਧ ਰਿਹਾ ਹੈ। ਵਾਰਾਣਸੀ ਅਤੇ ਪ੍ਰਯਾਗਰਾਜ ਵਿੱਚ ਘਾਟਾਂ ਦੀਆਂ ਪੌੜੀਆਂ ਡੁੱਬ ਗਈਆਂ ਹਨ। ਕਾਸ਼ੀ ਵਿੱਚ ਦਸ਼ਾਸ਼ਵਮੇਧ ਤੋਂ ਲੈ ਕੇ ਪੰਚਗੰਗਾ ਘਾਟ ਤੱਕ ਰਤਨੇਸ਼ਵਰ ਮਹਾਦੇਵ ਮੰਦਿਰ ਸਮੇਤ 40 ਛੋਟੇ ਮੰਦਿਰਾਂ ਵਿੱਚ ਪਾਣੀ ਵੜ ਗਿਆ ਹੈ।
ਦੂਜੇ ਪਾਸੇ, ਰਾਜਸਥਾਨ ਵਿੱਚ ਮਾਨਸੂਨ ‘ਤੇ ਬ੍ਰੇਕ ਲੱਗਣ ਤੋਂ ਬਾਅਦ ਗਰਮੀ ਵਧਣ ਲੱਗੀ ਹੈ। ਬੀਕਾਨੇਰ ਮੰਡਲ ਦੇ ਤਿੰਨ ਜ਼ਿਲ੍ਹਿਆਂ ਵਿੱਚ ਐਤਵਾਰ ਨੂੰ ਤਾਪਮਾਨ 41 ਡਿਗਰੀ ਸੈਲਸੀਅਸ ਤੋਂ ਪਾਰ ਦਰਜ ਕੀਤਾ ਗਿਆ। ਰਾਜ ਭਰ ਵਿੱਚ ਕਿਤੇ ਵੀ ਭਾਰੀ ਮੀਂਹ ਨਹੀਂ ਪਿਆ।ਮੌਸਮ ਵਿਭਾਗ ਨੇ ਸੋਮਵਾਰ ਲਈ ਰਾਜ ਦੇ 24 ਜ਼ਿਲ੍ਹਿਆਂ ਵਿੱਚ ਮੀਂਹ ਦਾ ਯੈਲੋ ਅਲਰਟ ਜਾਰੀ ਕੀਤਾ ਹੈ, ਜੋ ਅਗਲੇ ਤਿੰਨ ਦਿਨਾਂ ਤੱਕ ਲਾਗੂ ਰਹੇਗਾ। ਇਸ ਦੌਰਾਨ ਤੇਜ਼ ਹਵਾਵਾਂ ਦੇ ਨਾਲ ਅਸਮਾਨੀ ਬਿਜਲੀ ਡਿੱਗਣ ਦੀ ਵੀ ਚੇਤਾਵਨੀ ਦਿੱਤੀ ਗਈ ਹੈ।
ਉੱਤਰਾਖੰਡ ਦੇ ਰੁਦਰਪ੍ਰਯਾਗ ਜ਼ਿਲ੍ਹੇ ਵਿੱਚ ਲਗਾਤਾਰ ਹੋ ਰਹੀ ਭਾਰੀ ਬਾਰਿਸ਼ ਕਾਰਨ ਕਈ ਥਾਵਾਂ ‘ਤੇ ਲੈਂਡਸਲਾਈਡ (ਜ਼ਮੀਨ ਖਿਸਕਣ) ਹੋਇਆ ਹੈ। ਇਸ ਦੇ ਚਲਦਿਆਂ ਕੇਦਾਰਨਾਥ ਹਾਈਵੇਅ ‘ਤੇ ਮਲਬਾ ਆਉਣ ਕਾਰਨ ਆਵਾਜਾਈ ਪੂਰੀ ਤਰ੍ਹਾਂ ਠੱਪ ਹੋ ਗਈ ਹੈ। ਪ੍ਰਸ਼ਾਸਨ ਨੇ ਮਲਬਾ ਹਟਾਉਣ ਅਤੇ ਸੜਕ ਨੂੰ ਸਾਫ਼ ਕਰਨ ਦਾ ਕੰਮ ਸ਼ੁਰੂ ਕਰ ਦਿੱਤਾ ਹੈ। ਯਾਤਰੀਆਂ ਨੂੰ ਮੌਸਮ ਆਮ ਹੋਣ ਤੱਕ ਸੁਚੇਤ ਰਹਿਣ ਅਤੇ ਫਾਲਤੂ ਯਾਤਰਾ ਤੋਂ ਬਚਣ ਦੀ ਅਪੀਲ ਕੀਤੀ ਗਈ ਹੈ।
ਜੰਮੂ-ਕਸ਼ਮੀਰ ਦੇ ਕਟੜਾ ਵਿੱਚ ਲਗਾਤਾਰ ਹੋ ਰਹੀ ਭਾਰੀ ਬਾਰਿਸ਼ ਅਤੇ ਖ਼ਰਾਬ ਮੌਸਮ ਕਾਰਨ ਵੈਸ਼ਨੋ ਦੇਵੀ ਯਾਤਰਾ ਲਗਾਤਾਰ ਦੂਜੇ ਦਿਨ ਵੀ ਮੁਲਤਵੀ ਰਹੀ। ਸ਼ਰਧਾਲੂਆਂ ਦੀ ਸੁਰੱਖਿਆ ਨੂੰ ਦੇਖਦੇ ਹੋਏ ਪ੍ਰਸ਼ਾਸਨ ਨੇ ਯਾਤਰਾ ‘ਤੇ ਰੋਕ ਜਾਰੀ ਰੱਖੀ ਹੈ।ਜੰਮੂ-ਕਸ਼ਮੀਰ ਦੇ ਰਾਜੌਰੀ ਜ਼ਿਲ੍ਹੇ ਵਿੱਚ ਤੇਜ਼ ਮੀਂਹ ਤੋਂ ਬਾਅਦ ਅਚਾਨਕ ਆਏ ਹੜ੍ਹ (ਫਲੈਸ਼ ਫਲੱਡ) ਨੇ ਭਾਰੀ ਤਬਾਹੀ ਮਚਾਈ। ਸਾਜ ਇਲਾਕੇ ਵਿੱਚ ਸੜਕ ਨਿਰਮਾਣ ਕੰਪਨੀ ਦਾ ਕਰੱਸ਼ਰ ਅਤੇ ਹੌਟ ਮਿਕਸ ਪਲਾਂਟ ਹੜ੍ਹ ਦੀ ਲਪੇਟ ਵਿੱਚ ਆ ਗਿਆ। ਹੜ੍ਹ ਦੇ ਤੇਜ਼ ਬਹਾਅ ਵਿੱਚ ਟਰੱਕ, ਡੰਪਰ, ਜੇਸੀਬੀ ਸਮੇਤ ਕਈ ਮਸ਼ੀਨਾਂ ਰੁੜ੍ਹ ਗਈਆਂ। ਕੰਪਨੀ ਦੇ ਅਧਿਕਾਰੀਆਂ ਮੁਤਾਬਕ ਇਸ ਹਾਦਸੇ ਵਿੱਚ ਕਈ ਕਰੋੜ ਰੁਪਏ ਦਾ ਨੁਕਸਾਨ ਹੋਇਆ ਹੈ।
