ਮੋਹਾਲੀ ‘ਚ NRI ਨਾਲ ਫ਼ਰਾਡ, iPhone ਲੈ ਕੇ ਕੁੜੀ ਫ਼ਰਾਰ!
ਮੋਹਾਲੀ ਵਿੱਚ ਫੇਸਬੁੱਕ ਮਾਰਕੀਟਪਲੇਸ ਦੇ ਜ਼ਰੀਏ ਇੱਕ ਐੱਨਆਰਆਈ (NRI) ਨਾਲ ਠੱਗੀ ਮਾਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਫੇਸਬੁੱਕ ‘ਤੇ ਆਈਫ਼ੋਨ ਖ਼ਰੀਦਣ ਦੇ ਬਹਾਨੇ ਇੱਕ ਮੁਟਿਆਰ ਨੇ ਕੈਨੇਡੀਅਨ ਨਾਗਰਿਕ ਨੂੰ ਮੋਹਾਲੀ ਦੇ ਸੈਕਟਰ-85 ਸਥਿਤ ‘ਵੇਵ ਐਸਟੇਟ ਸੋਸਾਇਟੀ’ ਵਿੱਚ ਬੁਲਾਇਆ। ਕੁੜੀ ਨੇ ₹1.19 ਲੱਖ ਦਾ ਆਈਫ਼ੋਨ ਲੈ ਲਿਆ, ਪਰ ਮੌਕੇ ‘ਤੇ ਸਿਰਫ਼ ₹20,000 ਨਕਦ ਦਿੱਤੇ।ਬਾਕੀ ਰਹਿੰਦੇ ₹99,000 ਦੀ ਨਕਲੀ (ਫਰਜ਼ੀ) ਆਨਲਾਈਨ ਪੇਮੈਂਟ ਰਸੀਦ ਦਿਖਾ ਕੇ ਉਹ ਉੱਥੋਂ ਫ਼ਰਾਰ ਹੋ ਗਈ। ਪੀੜਤ NRI ਅਮਰਿੰਦਰ ਸਿੰਘ ਹੁੰਦਲ ਦੀ ਸ਼ਿਕਾਇਤ ‘ਤੇ ਮੋਹਾਲੀ ਦੀ ਐੱਨਆਰਆਈ ਪੁਲਿਸ ਨੇ ਦਿੱਲੀ ਦੀ ਰਹਿਣ ਵਾਲੀ ਮੁਲਜ਼ਮ ਕੁੜੀ ਜੈਸਮੀਨ ਕੌਰ ਖ਼ਿਲਾਫ਼ ਧੋਖਾਧੜੀ ਦਾ ਮਾਮਲਾ ਦਰਜ ਕਰ ਲਿਆ ਹੈ।
ਫੇਸਬੁੱਕ ‘ਤੇ ਹੋਈ ਸੀ ਡੀਲ:
ਮੋਹਾਲੀ ਵਿੱਚ ਰਹਿ ਰਹੇ ਕੈਨੇਡੀਅਨ ਨਾਗਰਿਕ ਅਮਰਿੰਦਰ ਸਿੰਘ ਨੇ ਆਪਣਾ iPhone 17 Pro Max ਵੇਚਣ ਲਈ ਫੇਸਬੁੱਕ ਮਾਰਕੀਟਪਲੇਸ ‘ਤੇ ਵਿਗਿਆਪਨ (ਲਿਸਟਿੰਗ) ਪਾਇਆ ਸੀ। ਇਸ ਤੋਂ ਬਾਅਦ ਜੈਸਮੀਨ ਨਾਂ ਦੀ ਕੁੜੀ ਨੇ ਫ਼ੋਨ ਖ਼ਰੀਦਣ ਲਈ ਉਨ੍ਹਾਂ ਨਾਲ ਸੰਪਰਕ ਕੀਤਾ ਅਤੇ ਸੌਦਾ ₹1.19 ਲੱਖ ਵਿੱਚ ਤੈਅ ਹੋਇਆ।
ਕਿਰਾਏ ਦੇ ਫਲੈਟ ‘ਚ ਬੁਲਾਇਆ:
ਕੁੜੀ ਨੇ ਅਮਰਿੰਦਰ ਸਿੰਘ ਨੂੰ ਸੈਕਟਰ-85 ਸਥਿਤ ਵੇਵ ਐਸਟੇਟ ਦੇ ਇੱਕ ਫਲੈਟ ਵਿੱਚ ਬੁਲਾਇਆ। ਉੱਥੇ ਉਸ ਨੇ ਆਈਫ਼ੋਨ ਲੈ ਲਿਆ ਅਤੇ ਸਿਰਫ਼ ₹20,000 ਕੈਸ਼ ਦਿੱਤੇ। ਬਾਕੀ ਦੇ ₹99,000 ਟ੍ਰਾਂਸਫਰ ਕਰਨ ਦਾ ਦਾਅਵਾ ਕਰਦਿਆਂ ਉਸ ਨੇ ਇੱਕ ਨਕਲੀ ਆਨਲਾਈਨ ਟ੍ਰਾਂਜੈਕਸ਼ਨ ਸਲਿੱਪ (ਰਸੀਦ) ਦਿਖਾ ਦਿੱਤੀ, ਪਰ ਅਮਰਿੰਦਰ ਦੇ ਖਾਤੇ ਵਿੱਚ ਪੈਸੇ ਕਦੇ ਜਮ੍ਹਾਂ ਨਹੀਂ ਹੋਏ।
Airbnb ਫਲੈਟ ਲੈ ਕੇ ਰਹਿ ਰਹੀ ਸੀ ਠੱਗ:
ਜਦੋਂ ਅਮਰਿੰਦਰ ਨੇ ਸ਼ੱਕ ਪੈਣ ‘ਤੇ ਦੁਬਾਰਾ ਉਸ ਫਲੈਟ ‘ਤੇ ਜਾ ਕੇ ਪੜਤਾਲ ਕੀਤੀ, ਤਾਂ ਪਤਾ ਲੱਗਾ ਕਿ ਕੁੜੀ ਜਿਸ ਫਲੈਟ ਵਿੱਚ ਰੁਕੀ ਹੋਈ ਸੀ, ਉਹ ਅਸਲ ਵਿੱਚ ਕਿਰਾਏ ‘ਤੇ ਲਿਆ ਗਿਆ ਸੀ। ਫਲੈਟ ਦੇ ਮੈਨੇਜਰ ਮਿਸਟਰ ਸੋਹੀ ਨੇ ਦੱਸਿਆ ਕਿ ਉਸ ਕੁੜੀ ਨੇ ਉਨ੍ਹਾਂ ਨਾਲ ਵੀ ਕਿਰਾਏ ਦੇ ਮਾਮਲੇ ਵਿੱਚ ਧੋਖਾਧੜੀ ਕੀਤੀ ਹੈ।
ਦਿੱਲੀ ਦੀ ਰਹਿਣ ਵਾਲੀ ਹੈ ਮੁਲਜ਼ਮ ਮਹਿਲਾ:
ਪੀੜਤ ਅਮਰਿੰਦਰ ਸਿੰਘ ਦੀ ਲਿਖਤੀ ਸ਼ਿਕਾਇਤ ‘ਤੇ ਪੁਲਿਸ ਨੇ ਸ਼ੁਰੂਆਤੀ ਜਾਂਚ ਤੋਂ ਬਾਅਦ ਮਾਮਲਾ ਦਰਜ ਕਰ ਲਿਆ ਹੈ। ਪੁਲਿਸ ਨੇ ਭਾਰਤੀ ਨਿਆਏ ਸੰਹਿਤਾ (BNS), 2023 ਦੀ ਧਾਰਾ 316(2) (ਅਮਾਨਤ ਵਿੱਚ ਖ਼ਿਆਨਤ) ਅਤੇ ਧਾਰਾ 318(4) (ਧੋਖਾਧੜੀ) ਦੇ ਤਹਿਤ ਮੁਕੱਦਮਾ ਨੰਬਰ 20 ਦਰਜ ਕਰਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।